३ दिने आम हडतालः यस्तो देखियो काठमाडौं (फोटो फिचर)
चैत, काठमाडौं ।
एकीकृत माओवादी नेतृत्वको ३० दलीय विपक्षी मोर्चाले आह्वान गरेको तीन दिने आमहडतालको पहिलो दिन आज राजधानी काठमाडौं सहित अधिकाँश जिल्लामा उद्योग कलकारखाना तथा विद्यालय लगायतका संघ संस्था बन्द भएका छन् ।
आमहडतालका कारण लामो र छोंटो दुरीका सवारी साधन चल्न सकेका छैनन् भने सडकमा पैदल यात्रुको घुँइचो देखिन्छ ।
यसैबीच प्रहरीले बन्द गराउँदै हिँड्ने क्रममा एकीकृत माओवादीका नेता कार्यकर्तालाई पक्राउ गरेको छ । प्रहरीले एमाओवादी अध्यक्ष पुष्पकमल दाहाल प्रचण्डकी छोरी एवं नेतृ रेणु दाहाल, नेता हिमाल शर्मा लगायतका विद्यार्थी नेता पक्राउ परेका छन् ।
बिजुली बजार क्षेत्रबाट प्रहरीले उनीहरुलाई पक्राउ गरेको हो । पक्राउ गर्ने क्रममा पूर्व विद्यार्थी नेता समेत रहेका हिमाल शर्मामाथि दुर्व्यवहार र कुटपिट समेत गरिएको क्रान्तिकारीले जनाएको छ ।
हिसिला, जनार्दन र झक्कु सडकमा
एमाओवादी नेता एवं पूर्व प्रधानमन्त्री डा बाबुराम भट्टराईकी पत्नी एवं नेतृ हिसिला यमी बन्द सफल बनाउन सडकमै उत्रिएकी छिन् । त्यस्तै संसदको लेखा समितिका सभापति एवं एमाओवादी सभाषद जनार्दन शर्मा र एमाओवादी नेता झक्कु सुवेदी समेत सडकमा देखिए ।
विहानै बन्दकर्ताहरुले बन्दको अवज्ञा गरेको भन्दै कोटेश्वर बालकुमारी क्षेत्रमा एक ट्याक्सी जलाएका थिए । विजुली बजारमा एउटा मोटरसाइकल जलाएका थिए ।
उता बन्दकर्ताहरुले काभ्रेको बुडोल १० स्थीत निरज श्रेष्ठको घरनजिक सिलिण्डर विष्फोट गराएका छन् । विष्फोबाट श्रेष्ठको घरको झ्याल र कोठामा सामान्य क्षती पुगेको छ ।
भर्खरै प्राप्त समाचार अनुसार काठमाडौंको विजुली बजार क्षेत्रमा बन्दकर्ता र प्रहरीबीच भिडन्त भएको छ । प्रहरीले बन्दकर्ता नियन्त्रणमा लिन अश्रु ग्यास प्रहार गरेको हाम्रा संवाददाताले जनाएका छन् ।source:nepali headline
