सेनाको सुरक्षा घेराभित्रबाट हराएको भैरबीको मुकुट भेटियो चोरीमा संलग्न ८ जना सार्वजनिक
नुवाकोट, कात्तिक १४–नेपालका प्रमुख शक्तिपीठहरुमध्ये प्रसिद्ध मानिएको नुवाकोटको भैरवीदेवी मन्दिरबाट चोरी भएको पुरातात्विक र बहुमुल्य वस्तुहरुसहित त्यसमा संलग्न व्यक्तिहरुलाई प्रहरीले पक्राउ गरेको छ । गत साउन ३१ गते राती चोरी भएको भैरवीको मुकुट र अन्य वस्तुहरुसहित चोरीमा संलग्न ८ जनालाई नुवाकोट प्रहरीले पक्राउ गरी सार्वजनिक गरेको हो ।
चोरी भएका सामग्रीहरुमध्ये सिक्रिका टुक्का १ थान, मुकुटमा लगाउने किकिम्पा १ थान फेला पर्न बाँकि रहेको प्रहरीले जनाएको छ । चोरीमा अन्य संलग्न ३ देखि ४ जना रहेको अनुमान गर्दै प्रहरीले अनुसन्धान गरिरहेको जिल्ला प्रहरी प्रमुख अरुण पौडेलले जानकारी दिए ।
मन्दिर नजिकै प्रहरी र नेपाली सेनाको टुकडीले सुरक्षा दिइरहेको समयमासमेत यसरी चोरी भएको थियो । बत्ती नभएको समयमा भैरवी मन्दिरको ढोकामा लागाउन प्रयोग गरिने दुईवटा भोटे ताल्चा फोरेर यी वस्तुहरु चोरिएका थिए । पाँच वर्ष अगाडी देवीघाटमा रहेको जालपादेवी मन्दिरबाट पनि हराएको मुर्ति अझै फेला परेको छैन ।source:ratopati
